Казан мәдәният институты бинасы каршында “вакыт капсула”сы салып калдырылды

27 май 2020 ел., чәршәмбе

27 майда, Бөтенсоюз Үзәк Башкарма Комитеты һәм РСФСРның Халык Комиссарлары Советының “Автономияле Татар Социалистик Совет Республикасы төзү турында” Декреты чыккан көнне Казан дәүләт мәдәният институты бинасы каршында “вакыт капсула”сы салып калдырылды.

Тантанада Татарстан Премьер-министры урынбасары Ләйлә Фазлыева, "Юл хәрәкәте иминлеге” дәүләт бюджет учреждениесе җитәкчесе Рифкат Миңнеханов, Татарстан Республикасы Президенты каршындагы Мәдәниятне үстерүгә булышлык күрсәтү фонды башкарма директоры Нурия Һашимова, Татарстанның халык артисты Салават Фәтхетдинов һәм башакалар катнаштылар.

Капсулада Казан дәүләт мәдәният институтының иҗат төркеме ТАССРның 100 еллыгына әзерләгән телевизион ретро-концертның программасы, Татарстан Республикасында мәдәният һәм сәнгать өлкәсендә соңгы 100 елда иҗат ителгән иң яхшы әсәрләр, шулай ук Идел буе федераль округында яшәүчеләрдән килгән фото, аудио һәм видео материаллар булачак.

“100 еллыкны билгеләгәндә, үткәннәргә нәтиҗәләр ясап карасак, ТАССРның шушы 100 елында сәнгатьнең барлык төре - музыка, хореография, балет, әдәбият, шигърият, опера, театр, кино - чәчәк аткан һәм ул алтын гасыр булган дип горурланып әйтә алабыз! Бүген безнең бурыч – халкыбызның бай мәдәни мирасын өйрәнеп, аны саклау һәм киләчәк буыннарга тапшыру. Һәм безнең миссия 100 ел дәвамында иҗат ителгән әсәрләрнең алтын фондын туплап, аны вакыт капсуласына салып, киләчәк буыннарга тапшыру”, - Казан дәүләт мәдәният институты ректоры, педагогика фәннәре докторы, профессор Роза Әхмәдиева.

ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International