Рөстәм Миңнеханов VI "Мәскәү –Татарстан" күпере" яшьләр форумында катнашты
Форумның оештыручысы - Татарстан Республикасының Россия Федерациясендәге Вәкаләтле вәкиллеге. Форумда 35 яшькә кадәрге кешеләр катнаша, алар барысы да Татарстанның күпмилләтле республикасыннан яки Россиянең башка төбәкләреннән килгән татарлар. Форумның максаты - Мәскәү төбәгенең яшьләр берләшмәләрен берләштерү, яшьләрне социаль адаптацияләүгә ярдәм итү, аларны Татарстан Республикасы белән хезмәттәшлеккә җәлеп итү. Беренче форум 2015 елның язында узды.
Чарада катнашучылар алдында сәламләү сүзе белән Татарстан Республикасының Россия Федерациясендәге Вәкаләтле вәкиле Равил Әхмәтшин, Мәскәү шәһәренең милли сәясәт һәм төбәкара элемтәләр департаменты җитәкчесе Виталий Сучков чыгыш ясады.
Быел форумда шагыйрь, Советлар Союзы Герое Муса Җәлилнең кызы Чулпан Муса кызы Җәлилова катнашты. Ул үзенең танылган әтисе турында сөйләде, иҗади мираска һәм Муса Җәлил истәлегенә булган игътибары өчен рәхмәт белдерде.
Рөстәм Илгиз улы Нәбиев (2015 елда казарма җимерелгәндә исән калган һәм ике аягын югалткан десантчы, танылган блогер-мотиватор) үзе һәм аны сындырмаган, әмма көчлерәк иткән хәлләр турында сөйләде. Тернәкләнүдән соң ул паралимпия спорты белән шөгыльләнә башлый. "Иң зур казанышың нәрсә, дип сораганда, мин үз гаиләмне атыйм, - диде ул. - Мин бәхетле кеше. 2020 елның сентябрендә мин Эльбруска кул белән менгән беренче кеше булдым. 8 мең метрдан артык биеклектәге Гималай тавын яулыйсы килә. Мин моны эшләрмен дип өметләнәм, чөнки үз-үземә ышанам. Инвалидлык - ул хөкем карары түгел, бу - яңа мөмкинлекләр. Мин бу дөньяны күрүем белән бәхетле, чөнки иртәгә безнең белән нәрсә буласын беркем дә белми".
Уңыш серләре белән Россия Хөкүмәте Рәисе урынбасары Марат Хөснуллин уртаклашты. "Уңышлы булу өчен нәрсә эшләргә кирәк?" дигән сорауга җавапта, минем фикеремчә, формула шактый гади: эшләргә, эшләргә һәм эшләргә кирәк. Син булган урында эшләргә, эшли белгән һәм, иң мөһиме, яраткан эш белән шөгыльләнергә, шулай ук үз өстеңдә эшләргә кирәк. Кеше үз баш миендәге белемнәр өстендә даими эшләргә тиеш. Укырга, көчле кешеләр белән эшләргә курыкмаска кирәк", - диде Марат Хөснуллин.
Ул билгеләп үткәнчә, аңа җитәкчеләр белән бәхет елмайган — аларТатарстанның беренче Президенты, ТР Дәүләт Киңәшчесе Минтимер Шәймиев һәм Татарстан Президенты Рөстәм Миңнеханов. "Рөстәм Нургалиевич, гомумән, минем укытучым, ул мине Татарстан Хөкүмәтенә чакырды", — диде Марат Хөснуллин.
Татарстан Республикасы Президенты Рөстәм Миңнеханов үз чиратында форум спикерларыннан яңгыраган һәр тарих уникаль, дип ассызыклады. "Бүген чыгыш ясаучыларның барысы да уникаль, бик сәләтле кешеләр, - диде ул. - Һәм алар үрнәгендә яшьләрне тәрбияләргә омтылырга кирәк". Рөстәм Миңнеханов барысына да зур җиңүләр теләде һәм Татарстанга битараф булмаган мөнәсәбәт өчен рәхмәт белдерде. "Без сезнең белән горурланабыз", - диде ул, форумда катнашучыларга мөрәҗәгать итеп.
Татарстан Президенты сорауларга җавап биреп, "Мәскәү – Казан" автомагистрале проектын, Казан Изге Ана иконасы соборын төзеп бетерү һәм торгызу, шулай ук Идел буе Болгар дәүләтендә ислам динен кабул итүгә 1100 ел тулуны бәйрәм итүне иң мөһим вакыйга дип атады.
Соңрак Рөстәм Миңнеханов Татарстан Республикасы дәүләт бүләкләрен тапшырды.
Фото чыганагы - Бизнес Online