Грозный шәһәрендә Татарстан һәм Чечняның уртак Коръәннәр күргәзмәсе ачылды
Чечен Республикасы музеенда “Коръән - гармония тартылышы” күргәзмәсен ачу тантанасы узды. Чараның кунаклары – Татарстан Республикасы Президенты каршындагы Мәдәниятне үстерүгә ярдәм итү фондының башкарма директоры Нурия Хашимова җитәкчелегендәге Татарстан делегациясе. Шулай ук чарада ЧР мөфтие Сәлах-Хаҗи Мәҗиев, ЧР мәдәният министры Айшат Кадыйрова, Грозный мэры Хас-Мөхәммәт Кадыйров һәм башка рәсми затлар һәм мәдәният эшлеклеләре катнашты.
Күргәзмәдә “Казан Кремле” дәүләт тарих-архитектура һәм сәнгать музей-тыюлыгы коллекциясеннән тарихи әһәмиятле һәм сәнгатьчә бизәлгән гарәп текстындагы изге Коръән кулъязмаларының һәм басмаларының бай коллекциясе тәкъдим ителде. Шулай ук төрек, Иран, гарәп авторларының каллиграфик композицияләре күрсәтелде. Килүчеләр Коръәннең дөнья халыкларының төрле телләренә тәрҗемәләрен күрә алды.
Күргәзмәнең аерым бизәге Айшат Кадыйрованың чара өчен махсус тапшырган шәхси коллекциясе булды. Алар исемлегендә – Чечен Республикасының Беренче Президенты, Россия Герое Әхмәт-Хаҗи Кадыйровныкы булган XIX гасыр Коръәне, зәркән алтын тышлыктагы эксклюзив бүләк Коръәне һәм ике кечкенә Коръән.
Татарстан Республикасы Президенты каршындагы Мәдәниятне үстерүгә ярдәм фонды башкарма директоры Нурия Хашимова Чечен Республикасы җитәкчелегенә Татарстан Президенты Рөстәм Миңнеханов исеменнән рәхмәт белдерде һәм уртак проектның Грозный һәм Казан шәһәрләре арасындагы дуслык күпере булачагын билгеләп үтте.
Татарстан делегациясе ЧР мәдәният министры Айшат Кадыйровага бүләк Коръәнен – көмеш һәм күннән ясалган зәркән басмасын бүләк итте. Шулай ук Изге Коръәннәрне башкала мэры Хас-Мөхәммәт Кадыйров һәм ЧР мәгариф һәм фән министры Хуҗ-Бауди Дааев та тапшырды.
Күргәзмә РФ Президенты Владимир Путин тарафыннан 2022 елга Глобаль тема дип игълан ителгән Россия халыкларының халык сәнгате һәм матди булмаган мәдәни мирасы елына багышланган иде.