Зәй районында 10-нчы юбилей “Таҗетдин Ялчыгол укулары” узды
Зәйдә ел саен үткәрелә торган “Таҗетдин Ялчыгол укулары” фәнни-гамәли конференциясе булды. Быел ул Идел буе Болгар дәүләтендә ислам динен рәсми кабул итүгә 1100 ел тулуга багышланган.
Зәй районы башлыгы Рәзиф Кәримов бу җирдә һәрвакыт рәхмәтле һәм кунакчыл халык яшәвен билгеләп үтте. Ул ассызыклаганча, биредә яшәүче һәм районны данлаган танылган эшлеклеләрне, кешеләрне искә алалар.
- Таҗетдин Ялчыгол да шундый ук иде. Рәхмәтле зәйлеләр аны еллар дәвамында хөрмәтли. “Ялчыгол укулары” Зәйдә инде 10 ел үткәрелә. Конференция кысаларында без мөселманнарның әдәби һәм дини өлкәләрдәге яңа ачышлар турында сөйлибез, - дип искәртте Кәримов.
Чара Зәй районының Куш-Елга авылында уникаль ччишмә ачылудан башланды. Авылның чишмә сулы бердәнбер почмагы төзекләндерелгән. Ул “Хәзрәт чишмәсе” исемен йөртә. Тарихи мәгълүматларга караганда, чишмә элек Таҗетдин Ялчыгол буыныннан Фәхретдин һәм Фәйзулла хәзрәтләр нигез салган мәктәп янында урнашкан. Биредә белем алган балалар чишмәгә су алырга йөргән.
Чишмә – җирле халык өчен изге һәм шул ук вакытта заманча ял итү урыны. Аның территориясендә чишмә үзе һәм ике гамәлдәге кое бар. Суны алардан да алырга мөмкин. Биредә шулай ук күперләр, манаралар, тегермәннәр һәм зур кояшлы сәгатьләр рәвешендәге архитектура элементлары урнаштырылган. Тау, атынгыч, уен элементлары белән балалар күңел ачу зонасы аерым игътибарга лаек.
Аны ачу тантанасында Зәй районы башлыгы Рәзиф Кәримов һәм ТР Президенты каршындагы Мәдәниятне үстерүгә ярдәм фонды башкарма директоры Нурия Хашимова катнашты. Анда шулай ук җирле халык һәм Таҗетдин Ялчыгол буыны вәкилләре дә бар иде. Алар барысы да чишмәдән су татып карый алды. Кунаклар әйтүенчә, ул чыннан да чиста һәм тәмле.
Соңрак алар авыл зиратында Ялчыгол токымын искә алды. Имәнлебаш авылында җыелучылар Таҗетдин Ялчыголның каберендә булды. Гадәт буенча аның каберендә дога укылды.
Конференциянең теоретик өлеше узган авыл мәдәният йортына таба барганда, кунаклар татар халкы тормышындагы тарихи күргәзмә белән танышты.
“Таҗетдин Ялчыгол укулары” фәнни-гамәли конференциясенең пленар утырышы “Ялчыгол мирасы - халкыбыз хәзинәсе” темасына багышланды. Район башлыгы Рәзиф Кәримов, кунакларны сәламләп, зәйлеләрнең Ялчыгол мирасын өйрәнү, саклау һәм популярлаштыру буенча зур эшләре турында сөйләде. Конференциядә катнашучыларга сәламләү сүзе белән Татарстан Республикасы Президенты Аппараты җитәкчесе исеменнән ТР Президенты каршындагы Мәдәниятне үстерүгә ярдәм фондының башкарма директоры Нурия Хашимова да мөрәҗәгать итте.
Утырышның спикерлары Таҗетдин Ялчыголның татар халкы тормышындагы роле һәм аның фәнни хезмәтләрен популярлаштыру турындагы докладлар белән чыгыш ясады.